Onderwys is ons almal se verantwoordelikheid. Só glo die ATKV.
Wanneer die ATKV se onderwysspan in ’n distrik betrokke raak, word die amptenare van die onderwysdepartement, skoolbeheerliggame, ouers, onderwysers en selfs die skoonmakers se koppe geskuif om ’n beter toekoms vir ons leerders te verseker.
Die ATKV-Kopskuifprogram strek oor drie jaar en word in gekose distrikte aangebied. Die eerste jaar is intensief en verskeie kontaksessies word gehou. Gedurende die tweede jaar word skole gemonitor en bygestaan, terwyl die werk in die derde jaar spesifiek gefokus word op behoeftes in die skoolgemeenskap. Die ATKV fasiliteer hierdie ingrepe, maar werk baie nou saam met ander instansies om seker te maak dat die regte hulp aangebied word.
Skole en personeel wat die eerste jaar se sessies bygewoon het, word vereer tydens ’n glansgeleentheid waar sertifikate oorhandig word en samewerking gevier word.
Izak de Vries het onlangs twee van hierdie funksies bygewoon en deel sy indrukke.
2 September: Springbok
Op 2 September 2017 het die ATKV ’n funksie vir die skole van die Kammiesbergstreek in die Noord-Kaap gehou.
Die funksie is in ’n skoolsaal in Springbok gehou.
Die tafels is getooi om dankie te sê vir almal se harde werk.
Verskeie hoë amptenare uit die streek het die funksie bygewoon.
Reggie Cloete (regs) is die kringbestuurder van Kammiesberg. Hier is hy saam met sy gade, Leonie.
Melvina Mason Hearne is die ATKV se programorganiseerder in die Wes- en Noord-Kaap. Sy sê talle skole het hard gewerk om saam met die ATKV die breë plaaslike gemeenskap te help.
Sy het het egter geen doekies omgedraai nie: nadat sy lof betuig aan die aanwesiges, skiet sy ook berekende woorde van kritiek op onderwysers en die amptenary wat nie hulle samewerking gee nie.
Susara Nero, ’n raadslid van Kammiesberg, het almal verwelkom en het die ATKV bedank vir die werk wat hulle in skole doen.
Seymour Bothman, hoofbestuurder: Onderwys by die ATKV, sê die saamsnoer van talle rolspeler is belangrik. Die ATKV is net soos die fyn houtjies wat ’n vuur aan die gang kry: hulle span begin die werk en die plaaslike gemeenskap en verskeie vennote hou die vuur vorentoe brandend.
Garage, ’n ensemble onder leiding van die legendariese Alfred Hinkel, het die gehoor na hulle asems laat snak met hul puik dansvertonings.
Alfred Hinkel
Garage
Danny Titus, die uitvoerende direkteur: Kultuur van die ATKV, sê toe die jong dansers van Garage doen die skynbaar onmoontlike, ’n gepaste metafoor vir die harde werk wat in ons land gebeur. Die ATKV sien gereeld hoe jong mense bewys hulle kán byna ongelooflike dinge vermag. Neem Sulayman Human, wenner van ATKV-Muziq in 2017. Die jong man het 12 jaar gelede nog nie aan ’n klavier gevat het nie. Hy word toe raakgesien en die ATKV het ’n klavier aan hom geskenk. Vandag is hy een van die beste jong musikante in ons land en op pad om verder te studeer in die VSA.
Kitty Links, die direkteur van onderwys in die Namakwa-distrik, sê sy is reeds trots op die uitslae wat die skole onder haar leiding behaal en bedank toe die ATKV vir die jaar lange kopskuif wat hoop gee aan die leerders, die onderwysers en die ouers. Dié hoop help hulle om die gehalte van onderwys hoog te hou.
Quinton Adams, etnografiese navorser en opvoedkundige, het vertel van die werk wat hy saam met die ATKV doen om ouers te bemagtig. “Ons kan skole omdraai!” is sy boodskap aan die ouers. “En ons kan goeie skole nog beter maak.”
Die boodskap van sy program is: “Dissipline begin by die huis.” Hy gebruik beginsels uit die sielkunde en bedryfsielkunde om ouers te bemagtig.
Die krag van netwerke is weer bevestig toe Quinton aankondig dat Shantille Klaasse (in die middel) ’n rekenmeester wil word en dat sy ’n beurs gaan danksy Quinton se netwerke. Hier is sy by haar ouers.
Die ATKV loop al ’n paadjie met Shantille, en LitNet het ook al oor haar vasbytvermoë vertel – klik hier vir die berig.
Chareldine van der Merwe, wat vir die Vriende van Afrikaans (VVA) werk, het van hulle Boektrommelprojek vertel. Drie trommels, met ’n inhoud ter waarde van R7 000 elk, is in daardie die week oorhandig. Nog trommels sal later aan skole in die distrik gelewer word. LAPA Uitgewers is een van die bydraers tot hierdie trommels. Die VVA is ’n filiaal van die ATKV.
Sertifikate is toe oorhandig. Verskeie skole het ook 'n moedertaalpakket ontvang wat deur Afrikaans.com geborg is.
23 September: Malmesbury
Op 23 September 2017 is ’n geleentheid in Malmesbury vir Swartland, Kring 1, se skole gehou.
Die geleentheid is in ’n skoolsaal aangebied, maar die gaste was deeglik getooi en kon selfies neem voor die verrigtinge amptelik afgeskop het.
Melvina Mason Hearne het verduidelik dat die ATKV in hierdie streek hande vat met die Swartland Prinsipaleforum om saam-saam ’n verskil te maak.
Elgin Hendricks (regs) is die voorsitter van die Swartland Prinsipaleforum. Hy is hier saam met Seymour Bothman.
Swartland se onderburgemeester, Maude Goliath, het die geleentheid bygewoon en het verduidelik hoe belangrik die rol van NRO’s, en vennootskappe met hulle, vir die samelewing is.
Janine Adonis, prinsipaal van die Liebenberg Primêre Skool, was die gasvrou en mede-aanbieder by die Kuipskofgeleentheid.
Seymour Bothman, senior bestuurder: Onderwys by die ATKV, vertel toe van die belang van lees. LAPA Uitgewers se lekkerleesboeke is ’n belangrike deel van die ATKV se onderwysstrategie.
Khoi Noi (soos Amanda Lois Stone op die verhoog bekendstaan) en haar dansers was die gaskunstenaars. Amanda sing liedjies oor die Khoi en die bruin mense in Suid-Afrika.
Die dansers interpreteer die liedere. Die gehoor kry sodoende ’n visuele én ’n ouditiewe ervaring.
Wanda de Kock Bam, ’n skrywer en omroeper by Radio Kaapse Kansel, het kom gesels oor hoop. Dikwels kom hoop van plekke en mense waar die samelewing dit nie verwag nie, vertel sy. Mense moet egter nie hul hoop op “celebs” plaas nie, want hulle is ook mense en is feilbaar.
Johannes Mouton, die kringbestuurder, sê die groot uitdaging wat onderwysers in die gesig staar, is om in ’n veranderende wêreld steeds gehalte-onderwys te bied, want die meeste onnies is teenstrydig met die doelstellings van vandag se onderwys opgelei.
Hierop antwoord Melvina Mason Hearne toe en sê dit is presies waarom die ATKV kundiges inspan om onderwysers, skoolhoofde, bestuurspanne en die ouers te help. “Ek lei nie skoolhoofde op nie, want ek was nog nooit ’n skoolhoof nie,” sê sy. Daarom maak die ATKV gebruik van eksterne verskaffers soos die Federasie vir Beheerligame van Suid-Afrikaanse Skole (Fedsas) en die National Professional Teachers' Organisation of South Africa (Naptosa).
Lynne Herrman, bestuurder: professionele ontwikkeling Naptosa, het by Wanda Bam aangesluit en gevra dat onnies hard moet bly werk aan die tema van hoop. Die klaskamer het dit nodig, sê sy. Hoe anders sal die samelewing die leerders motiveer om harder te werk?
Johan Crous van Fedsas verduidelik hoe hy en sy span hande vat met die bestuursliggame van skole, en met die ATKV, om seker te maak dat die skoolgemeenskappe bemagtig word.
Hoekom werk Quinton Adams in plakkerskampe en in plakkershutte? Hy probeer verstaan hoe ons met die geweldige ongelykhede moet saamwerk en hoe ons die skreiende ongelykhede kan beveg. Om verandering te weeg te bring is baie harde werk, sê hy. Leiers moet voorvat. Onderwysers en ouers moet hulself opvoed en nuwe oplossings soek vir die land se uitdagings. Hy werk graag met die ATKV saam, want deur die netwerke wat hy só opbou, kan hy ook die boodskap aan verskeie vlakke van die samelewing help versprei dat almal die plaaslike gemeenskappe en die leerders ekonomies moet help bemagtig.
“Waarom sluit kinders by bendes aan?” vra hy. “Want bendes skep ’n ekonomiese stelsel waarbinne daardie jongmense kan tuishoort. Waarom skep ons nie ’n beter stelsel nie?”
Verskeie sertifikate is toe oorhandig.
The post ATKV-Kopskuif snoer gemeenskappe saam appeared first on LitNet.