"Afrikaans sal nie verdwyn nie," sê die joernalis Malixole Gwatyu.
Wanneer Malixole Gwatyu ín Afrikaans óór Afrikaans praat, sit jy regop en spits jou ore. Malixole, ’n gerespekteerde joernalis wat vier tale praat, sê egter hy gaan nie vir Afrikaans veg nie.
Malixole Gwatyu
Dadelik skuif jy vorentoe op jou stoel en vra jou af maar hoekom nie? Die antwoord is baie eenvoudig.
“Afrikaans sal leef en voortleef. Ek sien nie dat Afrikaans sal verdwyn nie, want daar is so baie mense – en diverse mense – wat dit praat.”
Malixole was saam met twee medejoernaliste, Vincent Mofokeng en Dumile Mateza, deel van ’n paneelbespreking wat Woensdagaand by die Afrikaanse Taal- en Kultuurvereniging (ATKV) onder leiding van Danny Titus, uitvoerende hoof: korporatiewe aangeleenthede, gehou is.
Dumile Mateza, Vincent Mofokeng, Malixole Gwatyu en Danny Titus
Malixole het op ’n plaas grootgeword en dis waar hy Afrikaans leer praat het. Sy joernalistieke loopbaan het in 2001 by Die Burger begin. Hy het later by die Landbouweekblad gedraai en is tans by RSG.
In die lig van die gebeure by die Hoërskool Overvaal en die Universiteit van die Vrystaat is Malixole van mening dat taal op sy eie nie ’n probleem kan wees nie. Dis eerder hoe mense die sprekers van die taal ervaar en dan sekere persepsies vorm. “Ons bewys Afrikaans nie ’n guns as ons die taal blameer nie.”
Dit is juis volgens Titus hoekom ’n paneelgesprek soos dié van kardinale belang is. “Afrikaans is ’n taal wat lewe en bruis, maar dis ook ’n taal wat baie kommer losmaak. Afrikaans is ’n taal van diversiteit en ons moet die rykheid hiervan erken.
“Dit is daarom dat ons by die ATKV besluit het om erkenning te gee vir die bydrae van African Afrikaanssprekendes, mense wat net ook vir Afrikaans lief is en hande wil vat om van Suid-Afrika ’n beter plek te maak.”
Vincent Mofokeng, die jong stem wat jy soggens op RSG se Monitor hoor, sê die mense van Suid-Afrika moet op ’n plek kom waar hulle met mekaar kan gesels en sê "Dis my taal, dit is wat dit verteenwoordig, vertel my oor jouself."
Dumile Mateza
Dumile Mateza, wat die eerste kommentator was wat sokker in Afrikaans uitgesaai het, stem saam en glo dat ons die regering verantwoordbaar moet hou, want die Grondwet bepaal dat alle tale gelyk is. “Ons moet opstaan vir dit waaraan ons glo. Dit is vir my ’n voorreg om Afrikaans te kan praat.”
Dié drie joernaliste is duidelik passievol oor Afrikaans en glo dat die taal deel kan wees van die oplossing in ons land, maar Malixole waarsku tog aan die einde: “Moenie te veel aan Afrikaans dink as ’n slagoffer nie. Hoe meer jy aan daardie idee gaan vasklou, hoe meer gaan mense vir jou probeer wys dat dit nie so is nie.”
Foto's: verskaf
The post "Afrikaans sal nie verdwyn nie" appeared first on LitNet.